الجمعة، 1 يونيو، 2012

بس يا أبو لسان طويل

انا قعدت مع نفسى و لقيت قدامى 3 اختيارات
اما .. مرسى اما .. شفيق اما .. مقاطعة الانتخابات و الاختيار ده مش عجبنى عشان هضيع حقى و كده كده الانتخابات هتتعمل يبقى اشارك و ادى صوتى للى شايفة احسن
لقيت الاخوان (مرسى) قالوا مش هنرشح حد للرياسة و رشحوا يعنى كدبوا علينا هتقولى اهو ... الاخوان كدابين .... انتخب شفيق بقى
لا يا ابو لسان طويل
رحت ابص على شفيق .. لقيته برده اول ما مسك رئيس وزارة قال مش هرشح نفسى للرياسة و اترشح .... يعنى هو كمان كداب
قلت اقارن من ناحية تانية
رحت لمرسى لقيت الناس بتقول ان الناس بتوع حملته بيعاملوا الشعب وحش و لسانهم طويل و بيشتموا فى شفيق و ناس اشتكت منهم هتقولى اهو .... بتوع مرسى معندهمش ادب انتخب شفيق
لا يا ابو لسان طويل
لقيت اللى ماسكين حملة شفيق و بيعملوا ليه دعاية ازبل خلق الله هقول على اللى انا شيفه بعينى اللى ماسك حملة شفيق فى الدايرة بتاعتى عضو حزب وطنى و عضو مجلس شعب سابق اللى اتحل ايام الثورة
باع اللى وراه و اللى قدامه عشان يدخل مجلس الشعب و يمص دم الناس و سمعته زفت عندنا هتقولى انتخبتوه ليه هقولك دة وصل مجلس الشعب فى الانتخبات بتاعت 99% حزب وطنى و فى انتخابات ما بعد الثورة اترشح مستقل و سقط
قلت اقارن من ناحية تانية
رحت لمرسى اشوف البرنامج لقيت مشروع النهضة و هيتنفذ على حوالى عشرين سنة بس مشروع واضح و خطواته موجودة بس عشرين سنة يعنى الاخوان هيمسكونا عشرين سنة ؟؟هتقولفى شفت .. الاخوان حاطين مشروع فى عشرين سنة عشان محدش يتكلم و يقولوهم انتم عملتوا اية غير بعد عشرين سنة .. انتخب شفيق
لا يا ابو لسان طويل
بصيت عند شفيق لقيت برنامج غير واضح المعالم ... القضاء على البطالة و اللاهتمام بالفقراء و الفلاحين ... الكلام المرسل العادى يعنى مش حاطط هدف معين لسه هيفكر يعمل اية بس قال هرجع الامن فى 24 ساعة
(بينى و بينكم انا اصدق واحد عمل مشروع لعشرين سنة و مصدقش واحد قال هرجع الامن فى 24 ساعة ) ما علينا الاتنين مش تمام
قلت اقارن من ناحية تانية اصل انا فاضيلهم مش ورايا جامعة.
رحت اشوف مين مع مرسى لقيت دكتور ابو الفتوح و العوا و الشيخ حازم و مشايخ السلفيين دول الاسلاميين و معاهم الليبراليين يسرى فودة و بلال فضل و وائل غنيم و تميم البرغوثى و كتير من شباب الثورة و الشخصيات المرموقة
هتقولى انتخب شفيق معاه ناس احسن و محترمين
لا يا ابو لسان طويل
لقيت اللى مع شفيق اولا من يطلقون على انفسهم ابناء مبارك يعنى اللى عاوزين مبارك يرجع تانى يحكم بالاضافة الى اعضاء مجلس الشعب المنحل اللى دخلوه عشان يمصوا دم الناس و كمان اولاد و اقارب الوزراء السابقين اللى محبوسين دلوقتى فى قضايا فساد و معاهم ناس تانية بردة محترمين بس مغيبيبن و معملهم غسيل مخ بالاضافة للرقصات فيفى و دينا و الهام شاهين و ليلى علوى و غيرهم
و اللى شايفنى كداب يقولى
(بينى و بينكم حاجة متشرفش و انا مرضاش يبقى صوتى فى وسط اصوات العالم الحرامية دول حتى لو شفيق نضيف لازم يتخلص من مستنقع الوساخة اللى مساكين حملاته)
قلت اقارن من ناحية تانية
مرسى راجل مدنى (مهندس و انا فى هندسة  )
و احنا مفيش رئيس مدنى مسكنا قبل كده هتقولى مرسى مش هيعرف يرجع الامن عشان مدنى
لا يا ابو لسان طويل
شفيق عسكرى و احنا مجربين العسكرى و اللى بتقول ان شفيق هيرجع الامن عشان عسكرى على اساس ان المشير معاه دبلوم صنايع ؟ ما هو عسكرى و مش عارف يرجع الامن
قالت اقارن من ناحية تانية
رحت لمرسى لقيت الناس بتقول عليه مش هنعرف نخلعه لو طلع وحش عشان مش هيسمح بالاحتجاج و المظاهرات
هتقولى اهو هيقطعنا و هيحبسنا كلنا انتخب شفيق
لا يا ابو لسان طويل
ما انت لسة من نص دقيقة قلت مش هيعرف يرجع الامن .... بقى بذمتك واحد مش هيعرف يرجع الامن و هيعرف يقضى على المظاهرات
بصيت عند شفيق لقيتة بيقول وش كده هستخدم الجيش فى حاله اى مظاهرات ضدى و ما حدث فى العباسية بروفة لذلك ...
قلت اقارن من ناحية تانية اووووف بقى احترت
موقفهم من الثورة
رحت لمرسى لقيت الاخوان نزلوا الثورة ... نزلوا متأخر ( ان تأتى متأخر خير من الا تأتى ابدا) مات منهم ناس بس سبونا نتقتل فى ماسبيرو و محمد محمود
هتقولى شفت خانوك .. انتخب شفيق
لا يا ابو لسان طويل
بصيت على شفيق لقيته هو اساسا من النظام اللى قتلنى مش منطق انى ازعل من واحد مدافعش عنى و اروح برجلى للى قتلنى
كل الكلام اللى بيتقال على الاخوان دلوقتى .. توقعات مش اكتر .. لكن شفيق عارفين هيعمل اية زى ما عمل قبل كده
بعد معادلتى دى اكتشفت انه هنتخب ان شاء الله مرسى
لو مرسى مش هيحقق اللى بنتمناته كله ... شفيق هيبقى اسوأ مما نتخيل
و من غير معادلات مرسى تفكر قبل ما تنتخبه ... شفيق ترفضه من غير ما تفكر
**بعض أجزاء من هذا المقال منقول من مدونة أخري.

ليست هناك تعليقات:

إرسال تعليق